ថ្នាក់ដឹកនាំសមាគមនារីខេត្តព្រះសីហនុ អញ្ជើញចុះសិក្សាស្វែងយល់ពីកន្លែងកែច្នៃគ្រឿងសមុទ្ររបស់សហគមន៍ស្ត្រី នៅស្រុកស្ទឹងហាវ

ស្រុកស្ទឹងហាវ៖ នារសៀលថ្ងៃទី ០៨ ខែឧសភា ឆ្នាំ២០២៦ លោកជំទាវ គីម សុភ័ក្រ្ត ម៉ាង ស៊ីណេត ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត រួមជាមួយ លោកស្រី ម៉ាក សំណាង ប្រធានសាខាសមាគមនារីខេត្ត បានអញ្ជើញចុះសិក្សាស្វែងយល់ផ្ទាល់នៅទីតាំងកែច្នៃគ្រឿងសមុទ្ររបស់សហគមន៍ស្ត្រី ស្ថិតនៅក្នុងស្រុកស្ទឹងហាវ។ សកម្មភាពចុះអមដំណើរនាឱកាសនោះដែរ ក៏មានការចូលរួមពីសំណាក់ លោកអភិបាលនៃគណៈអភិបាលស្រុកស្ទឹងហាវ ព្រមទាំងសមាជិកា សមាគមនារីខេត្ត-ស្រុក ជាច្រើនរូបទៀតផងដែរ។ គោលបំណងការចុះពិនិត្យគឺដើម្បីស្វែងយល់ពីវឌ្ឍនភាពការងារ ដំណើរការផលិតកម្ម ក៏ដូចជាការស្វែងរកដំណោះស្រាយចំពោះបញ្ហាប្រឈមនានារបស់សហគមន៍ស្ត្រីនៅក្នុងមូលដ្ឋាន សំដៅលើកកម្ពស់ជីវភាពរស់នៅ និងពង្រឹងសេដ្ឋកិច្ចគ្រួសារតាមរយៈរបរខ្នាតតូច និងមធ្យមនេះ។ ការចុះសិក្សាស្វែងយល់នេះ បានបង្ហាញឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំនារីខេត្ត ក្នុងការជំរុញតួនាទីស្ត្រីក្នុងវិស័យសេដ្ឋកិច្ច និងការអភិវឌ្ឍសហគមន៍មូលដ្ឋានឱ្យកាន់តែរឹងមាំថែមទៀត៕