ព័ត៌មានក្នុងខេត្ត

នៅព្រឹកថ្ងៃទី១២ ខែមិថុនា ឆ្នាំ២០២៦ លោក សាមុត សុធារិទ្ធ អភិបាលរងនៃគណៈអភិបាលខេត្តព្រះសីហនុ បានដឹកនាំកិច្ចប្រជុំពិភាក្សាការងារយ៉ាងយកចិត្តទុកដាក់ ជាមួយមន្ទីរ-អង្គភាពជំនាញពាក់ព័ន្ធ ដើម្បីដាក់ចេញនូវវិធានការសំខាន់ៗចំនួនពីរ ក្នុងគោលដៅអភិវឌ្ឍវិស័យទេសចរណ៍នៅក្រុងកោះរ៉ុង ឱ្យកាន់តែមានភាពទាក់ទាញ និងនិរន្តរភាព។

ខេត្តសៀមរាប៖ ក្នុងស្មារតីមនុស្សធម៌ដ៏ថ្លៃថ្លា «រួមគ្នាផ្តល់ក្តីសង្ឃឹម និងជីវិតថ្មីដល់កុមារៗ» នាព្រឹកថ្ងៃទី១២ ខែមិថុនា ឆ្នាំ២០២៦ លោក អ៉ី ធារិន អភិបាលស្រុកព្រៃនប់ និងភរិយា បានអញ្ជើញទៅកាន់មន្ទីរពេទ្យជ័យវរ្ម័នទី៧ (មន្ទីរពេទ្យគន្ធបុប្ផា ខេត្តសៀមរាប) ដើម្បីចូលរួមបរិច្ចាគឈាមដោយផ្ទាល់ និងបានឧបត្ថម្ភថវិកាចំនួន ៤០០,០០០ រៀល ជូនដល់មូលនិធិគន្ធបុប្ផាកម្ពុជា។

នៅព្រឹកថ្ងៃសុក្រ ទី១២ ខែមិថុនា ឆ្នាំ២០២៦ ដោយមានការយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋពីសំណាក់ ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ បានចាត់ឱ្យក្រុមការងារដឹកនាំដោយលោក សែជូ សិទ្ធិជោតិ លេខាធិការគណៈកម្មាធិការសាខា, លោក គាំ សុខុម នាយកសាខា, លោក នួន ប៊ុនថុល ប្រធានគណៈកម្មាធិការអនុសាខាក្រុងកំពង់សោម រួមជាមួយអ្នកស្ម័គ្រចិត្ត ចុះសួរសុខទុក្ខ និងនាំយកអំណោយមនុស្សធម៌ទៅប្រគល់ជូនគ្រួសារប្រជាពលរដ្ឋដែលមានជីវភាពខ្វះខាត និងមានជំងឺ។

នៅព្រឹកថ្ងៃទី១១ ខែមិថុនា ឆ្នាំ២០២៦ វេលាម៉ោង ៩:០០ នាទី លោក យូសុះ សូឡៃម៉ាន អភិបាលរង នៃគណៈអភិបាលខេត្តព្រះសីហនុ បានដឹកនាំកិច្ចប្រជុំពិភាក្សាការងារជាមួយប្រតិបត្តិករទូរគមនាគមន៍ក្នុងខេត្ត ស្តីពីការស្នើសុំផ្តល់ទិន្នន័យសេវាអ៊ីនធឺណិត និងការពិភាក្សាលើបញ្ហាប្រឈមនានា។

នៅព្រឹកថ្ងៃទី១១ ខែមិថុនា ឆ្នាំ២០២៦ លោក ទិត ប៊ុនធឿន នាយករងរដ្ឋបាលសាលាខេត្ត តំណាងឱ្យរដ្ឋបាលខេត្តព្រះសីហនុ បានដឹកនាំ “កិច្ចប្រជុំប្រចាំឆមាសទី១ ឆ្នាំ២០២៦ របស់ក្រុមការងារគ្រប់គ្រងក្របខ័ណ្ឌអនុវត្តការជំរុញបង្កើនការងារថែទាំសុខភាពបឋមខេត្ត”។

ព្រះសីហនុ៖ នារសៀលថ្ងៃទី១១ ខែមិថុនា ឆ្នាំ២០២៦ លោក សាមុត សុធារិទ្ធ អភិបាលរងខេត្តព្រះសីហនុ និងជាតំណាងដ៏ខ្ពង់ខ្ពស់របស់ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានទទួលជួបសម្តែងការគួរសមជាមួយលោក ម៉ាសាយ៉ូគិ អ៉ីវ៉ាគុរ៉ា (Masayuki IWAKURA) ប្រធានគ្រប់គ្រងផ្នែកផលិតផលឆ្លាតវៃ នៃរោងចក្រហាម៉ាម៉ាត្សូ ប្រទេសជប៉ុន របស់ក្រុមហ៊ុន MinebeaMitsumi Co., Ltd.។

នៅព្រឹកថ្ងៃពុធ ទី១០ ខែមិថុនា ឆ្នាំ២០២៦ លោក អ៉ី ធារិន អភិបាល នៃគណៈអភិបាលស្រុកព្រៃនប់ បានអញ្ជើញដឹកនាំសហការី និងមន្ត្រីជំនាញពាក់ព័ន្ធ ចុះពិនិត្យ និងបើកការដ្ឋានសាងសង់ផ្លូវបេតុងអាមេចំនួន ២ខ្សែ ស្ថិតក្នុងភូមិសាស្ត្រឃុំទឹកថ្លា និងឃុំសាមគ្គី ដើម្បីសម្រួលដល់ការធ្វើដំណើរ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន។

ខេត្តព្រះសីហនុ៖ នៅព្រឹកថ្ងៃពុធ ទី១០ ខែមិថុនា ឆ្នាំ២០២៦នេះ ដោយមានការយកចិត្តទុកដាក់ខ្ពស់ចំពោះសុខភាពប្រជាពលរដ្ឋ ពីសំណាក់ ឯកឧត្តម ម៉ាង ស៊ីណេត ប្រធានគណៈកម្មាធិការសាខាកាកបាទកម្ពុជាខេត្តព្រះសីហនុ បានចាត់ឱ្យ លោក សែជូ សិទ្ធិជោតិ លេខាធិការគណៈកម្មាធិការសាខា ដឹកនាំមន្រ្តីប្រតិបត្តិសាខា អ្នកស្ម័គ្រចិត្តចំនួន ៥៥នាក់ (ស្រី ១០នាក់) និងអាជ្ញាធរមូលដ្ឋាន សហការជាមួយមន្ត្រីជំនាញនៃមន្ទីរសុខាភិបាលខេត្ត ចុះធ្វើយុទ្ធនាការផ្សព្វផ្សាយ និងដាក់ថ្នាំអាល់ប៊ែត នៅក្នុងក្រុងព្រះសីហនុ។ យុទ្ធនាការនេះ នឹងប្រព្រឹត្តទៅរយៈពេល ២ថ្ងៃ (ចាប់ពីថ្ងៃទី១១ ដល់ថ្ងៃទី១២ ខែមិថុនា) ដោយគ្របដណ្តប់លើគ្រប់ភូមិ ក្នុងសង្កាត់ទាំង៤ នៃក្រុងព្រះសីហនុ ក្នុងគោលបំណងការពារ និងបង្ការជំងឺគ្រុនឈាម ព្រមទាំងជំងឺគ្រុនឈីក (Chikungunya) ដែលឆ្លងតាមរយៈមូសខ្លាញីខាំ។

នៅព្រឹកថ្ងៃអង្គារ ទី៩ ខែមិថុនា ឆ្នាំ២០២៦ នៅសាលប្រជុំក្រុមប្រឹក្សាខេត្ត ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានទទួលជួបសម្តែងការគួរសមជាមួយ លោក Krishnajie Partadireja កុងស៊ុលនៃស្ថានទូតឥណ្ឌូនេស៊ី ប្រចាំព្រះរាជាណាចក្រកម្ពុជា។ ក្នុងជំនួបនោះ ឯកឧត្តមអភិបាលខេត្ត បានសម្តែងការស្វាគមន៍យ៉ាងកក់ក្តៅ និងបានជម្រាបជូនអំពីសក្តានុពលរបស់ខេត្តព្រះសីហនុ ដែលមានរចនាសម្ព័ន្ធរដ្ឋបាលចែកជា ៦ក្រុង-ស្រុក ២៩ឃុំ-សង្កាត់ និង ១១១ភូមិ មានប្រជាពលរដ្ឋប្រមាណ ៣១ម៉ឺននាក់ ជាមួយទំហំ GDP ខេត្ត ១៣២លានដុល្លារ និង GDP សម្រាប់មនុស្សម្នាក់ជាង ៤,២០០ដុល្លារ។ ខេត្តសម្បូរទៅដោយធនធានធម្មជាតិ និងមានឆ្នេរសមុទ្រប្រវែង ១៧៥គីឡូម៉ែត្រ ដែលត្រូវបានប្រសិទ្ធនាមថាជាតារារះ "នាទិសនិរតី" និងជាសមាជិកក្លឹបឆ្នេរស្អាតជាងគេលើសកលលោកកាលពីឆ្នាំ២០១១។

ខេត្តព្រះសីហនុ៖ នាព្រឹកថ្ងៃច័ន្ទ ទី០៨ ខែមិថុនា ឆ្នាំ២០២៦ នៅសាលប្រជុំក្រុមប្រឹក្សាខេត្ត មានរៀបចំកិច្ចប្រជុំពង្រឹងការងារបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ក្រោមកិច្ចសហការរវាងគណៈបញ្ជាការឯកភាពរដ្ឋបាលខេត្តព្រះសីហនុ និងលេខាធិការដ្ឋានគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ប.ឆ.ប)។ កិច្ចប្រជុំនេះប្រព្រឹត្តទៅក្រោមអធិបតីភាព ឯកឧត្តមបណ្ឌិត យ៉េត វីណែល អនុប្រធានលេខាធិការដ្ឋាន គ.ប.ឆ.ប និងជាប្រធានក្រុមការងារទី២ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ និងមានការចូលរួមពីតំណាងមន្ទីរដែលពាក់ព័ន្ធ។

ខេត្តព្រះសីហនុ៖ នៅព្រឹកថ្ងៃទី០៨ ខែមិថុនា ឆ្នាំ២០២៦ ក្រុមការងារនៃអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រុងព្រះសីហនុ បានចុះជួបសំណេះសំណាលសួរសុខទុក្ខ ព្រមទាំងនាំយកនូវអំណោយ និងសម្ភារឧបត្ថម្ភចាំបាច់មួយចំនួន ទៅចែកជូនដល់បងប្អូនជាជនអនាថា និងជនវិបល្លាសស្មារតី ដែលកំពុងស្នាក់នៅអាគារស្នាក់នៅបណ្តោះអាសន្ន នៃមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តព្រះសីហនុ។ នៅក្នុងសកម្មភាពមនុស្សធម៌ដ៏មានអត្ថន័យនេះ អំណោយដែលត្រូវបាននាំយកទៅប្រគល់ជូនរួមមាន៖ នំចំនួន ១០០ កញ្ចប់ (ស្មើនឹង ២០០ នំ) ដែលជាការឧបត្ថម្ភដ៏ថ្លៃថ្លាពី លោកជំទាវ ប្រាក់ ច័ន្ទសុខា សមាជិកក្រុមប្រឹក្សាខេត្ត និងជាប្រធានគណៈកម្មាធិការកិច្ចការស្ត្រី និងកុមារខេត្តព្រះសីហនុ រួមជាមួយ លោកស្រី អេង គីមជូ អាជីវករបោះដុំគ្រឿងសមុទ្រ។ សាប៊ូដុសខ្លួន ២០០ ដុំ និងសាប៊ូម្សៅ ១០០កញ្ចប់ ជាការឧបត្ថម្ភពី លោក លឹម ផេង អាជីវករបោះដុំគ្រឿងក្រអូប។ ការចុះសួរសុខទុក្ខ និងផ្តល់ជំនួយឧបត្ថម្ភនាពេលនេះ មិនត្រឹមតែជួយសម្រាលដល់ការហូបចុក និងអនាម័យប្រចាំថ្ងៃរបស់បងប្អូនដែលកំពុងស្នាក់នៅទីនោះប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីការយកចិត្តទុកដាក់ និងទឹកចិត្តអាណិតស្រឡាញ់ មិនបោះបង់នរណាម្នាក់ចោលឡើយ។ តំណាងក្រុមការងារ ក៏ដូចជាថ្នាក់ដឹកនាំអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រុងព្រះសីហនុ បានសម្តែងនូវការគោរពថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានលះបង់ធនធានផ្ទាល់ខ្លួន ចូលរួមចំណែកក្នុងសកម្មភាពសង្គមដ៏វិសេសវិសាលនេះ និងសូមជូនពរឱ្យលោកជំទាវ លោកស្រី និងលោក ជួបតែសេចក្តីសុខចម្រើន និងជោគជ័យក្នុងគ្រប់ភារកិច្ច និងអាជីវកម្ម។ សូមជម្រាបជូនផងដែរថា សកម្មភាពទាំងនេះមិនមែនជាលើកទី១ទេ ដែលអនុសាខាសមាគមហន៍នារីកម្ពុជាដើម្បីសន្តិភាពនិងអភិវឌ្ឍន៍ក្រុងព្រះសីហនុ តែងតែចុះសំណេះសំណាល សួរសុខទុក្ខជាមួយជនវិបល្លាសស្មារតី ជនអនាថា ក៏ដូចជាប្រជាពលរដ្ឋ ជនចាស់ជរា ក្រីក្រ និងស្រ្តីសំរាលកូនដែលកំពុងជួបការលំបាក។ អត្ថបទ:ម៉ារ៉ាឌី

ស្រុកស្ទឹងហាវ៖ នារសៀលថ្ងៃទី ០៨ ខែឧសភា ឆ្នាំ២០២៦ លោកជំទាវ គីម សុភ័ក្រ្ត ម៉ាង ស៊ីណេត ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត រួមជាមួយ លោកស្រី ម៉ាក សំណាង ប្រធានសាខាសមាគមនារីខេត្ត បានអញ្ជើញចុះសិក្សាស្វែងយល់ផ្ទាល់នៅទីតាំងកែច្នៃគ្រឿងសមុទ្ររបស់សហគមន៍ស្ត្រី ស្ថិតនៅក្នុងស្រុកស្ទឹងហាវ។ សកម្មភាពចុះអមដំណើរនាឱកាសនោះដែរ ក៏មានការចូលរួមពីសំណាក់ លោកអភិបាលនៃគណៈអភិបាលស្រុកស្ទឹងហាវ ព្រមទាំងសមាជិកា សមាគមនារីខេត្ត-ស្រុក ជាច្រើនរូបទៀតផងដែរ។ គោលបំណងការចុះពិនិត្យគឺដើម្បីស្វែងយល់ពីវឌ្ឍនភាពការងារ ដំណើរការផលិតកម្ម ក៏ដូចជាការស្វែងរកដំណោះស្រាយចំពោះបញ្ហាប្រឈមនានារបស់សហគមន៍ស្ត្រីនៅក្នុងមូលដ្ឋាន សំដៅលើកកម្ពស់ជីវភាពរស់នៅ និងពង្រឹងសេដ្ឋកិច្ចគ្រួសារតាមរយៈរបរខ្នាតតូច និងមធ្យមនេះ។ ការចុះសិក្សាស្វែងយល់នេះ បានបង្ហាញឱ្យឃើញពីការយកចិត្តទុកដាក់ខ្ពស់របស់ថ្នាក់ដឹកនាំនារីខេត្ត ក្នុងការជំរុញតួនាទីស្ត្រីក្នុងវិស័យសេដ្ឋកិច្ច និងការអភិវឌ្ឍសហគមន៍មូលដ្ឋានឱ្យកាន់តែរឹងមាំថែមទៀត៕